תהילים - אמירת תהלים , סגולות תהלים , הכל על תהילים
    |     | חזור לגרסה הישנה     |

קריאה בעברית רהוטה / - פרק קט

6 קריאות


(א)
לַמְנַצֵּחַ לְדָוִד מִזְמוֹר אֱלֹהֵי תְהִלָּתִי אַל-תֶּחֱרַשׁ:
 
(ב)
כִּי פִי רָשָׁע וּפִי-מִרְמָה עָלַי פָּתָחוּ דִּבְּרוּ אִתִּי לְשׁוֹן שָׁקֶר:
 
(ג)
וְדִבְרֵי שִׂנְאָה סְבָבוּנִי וַיִּלָּחֲמוּנִי חִנָּם:
(ד)
תַּחַת-אַהֲבָתִי יִשְׂטְנוּנִי וַאֲנִי תְפִלָּה:
 
(ה)
וַיָּשִׂימוּ עָלַי רָעָה תַּחַת טוֹבָה וְשִׂנְאָה תַּחַת אַהֲבָתִי:
(ו)
הַפְקֵד עָלָיו רָשָׁע וְשָׂטָן יַעֲמד עַל-יְמִינוֹ:
 
(ז)
בְּהִשָּׁפְטוֹ יֵצֵא רָשָׁע וּתְפִלָּתוֹ תִּהְיֶה לַחֲטָאָה:
(ח)
יִהְיוּ-יָמָיו מְעַטִּים פְּקֻדָּתוֹ יִקַּח אַחֵר:
(ט)
יִהְיוּ-בָנָיו יְתוֹמִים וְאִשְׁתּוֹ אַלְמָנָה:
 
(י)
וְנוֹעַ יָנוּעוּ בָנָיו וְשִׁאֵלוּ וְדָרְשׁוּ מֵחָרְבוֹתֵיהֶם:
(יא)
יְנַקֵּשׁ נוֹשֶׁה לְכָל-אֲשֶׁר-לוֹ וְיָבזּוּ זָרִים יְגִיעוֹ:
(יב)
אַל-יְהִי-לוֹ משֵׁךְ חָסֶד וְאַל-יְהִי חוֹנֵן לִיתוֹמָיו:
 
(יג)
יְהִי-אַחֲרִיתוֹ לְהַכְרִית בְּדוֹר אַחֵר יִמַּח שְׁמָם:
(יד)
יִזָּכֵר עֲוֹן אֲבתָיו אֶל-יְהוָה וְחַטַּאת אִמּוֹ אַל-תִּמָּח:
 
(טו)
יִהְיוּ נֶגֶד-יְהוָה תָּמִיד וְיַכְרֵת מֵאֶרֶץ זִכְרָם:
(טז)
יַעַן אֲשֶׁר לֹא-זָכַר עֲשׂוֹת חָסֶד וַיִּרְדּף אִישׁ-עָנִי וְאֶבְיוֹן וְנִכְאֵה לֵבָב לְמוֹתֵת:
(יז)
וַיֶּאֱהַב קְלָלָה וַתְּבוֹאֵהוּ וְלֹא-חָפֵץ בִּבְרָכָה וַתִּרְחַק מִמֶּנּוּ:
 
(יח)
וַיִּלְבַּשׁ קְלָלָה כְּמַדּוֹ וַתָּבא כַמַּיִם בְּקִרְבּוֹ וְכַשֶּׁמֶן בְּעַצְמוֹתָיו:
 
(יט)
תְּהִי-לוֹ כְּבֶגֶד יַעְטֶּה וּלְמֵזַח תָּמִיד יַחְגְּרֶהָ:
 
(כ)
זאת פְּעֻלַּת שׂטְנַי מֵאֵת יְהוָה וְהַדּבְרִים רָע עַל-נַפְשִׁי:
 
(כא)
וְאַתָּה יֱהוִה אֲדנָי עֲשֵׂה-אִתִּי לְמַעַן שְׁמֶךָ כִּי-טוֹב חַסְדְּךָ הַצִּילֵנִי:
(כב)
כִּי-עָנִי וְאֶבְיוֹן אָנכִי וְלִבִּי חָלַל בְּקִרְבִּי:
(כג)
כְּצֵל כִּנְטוֹתוֹ נֶהֱלָכְתִּי נִנְעַרְתִּי כָּאַרְבֶּה:
 
(כד)
בִּרְכַּי כָּשְׁלוּ מִצּוֹם וּבְשָׂרִי כָּחַשׁ מִשָּׁמֶן:
 
(כה)
וַאֲנִי הָיִיתִי חֶרְפָּה לָהֶם יִרְאוּנִי יְנִיעוּן ראשָׁם:
 
(כו)
עָזְרֵנִי יְהוָה אֱלֹהָי הוֹשִׁיעֵנִי כְחַסְדֶּךָ:
 
(כז)
וְיֵדְעוּ כִּי-יָדְךָ זּאת אַתָּה יְהוָה עֲשִׂיתָהּ:
(כח)
יְקַלְלוּ הֵמָּה וְאַתָּה תְבָרֵךְ קָמוּ וַיֵּבשׁוּ וְעַבְדְּךָ יִשְׂמָח:
 
(כט)
יִלְבְּשׁוּ שׂוֹטְנַי כְּלִמָּה וְיַעֲטוּ כַמְעִיל בָּשְׁתָּם:
(ל)
אוֹדֶה יְהוָה מְאד בְּפִי וּבְתוֹךְ רַבִּים אֲהַלְלֶנּוּ:
(לא)
כִּי-יַעֲמד לִימִין אֶבְיוֹן לְהוֹשִׁיעַ מִשּׁפְטֵי נַפְשׁוֹ: